Trans
Dobbelt so stort program under årets Trans Pride: – Tilpassa til ulike typar folk
Arrangørane lærte frå i fjor, og vil i år tilby mykje meir enn fest og klubbing denne helga.
– Me har prøvd å tilpassa programmet til ulike typar folk, seier Tine Semb til Blikk.
Semb driv Karmaklubb*, som arrangerer årets Trans Pride i Oslo saman med ALPHADIVA (Lili-Andro Bergum) og PKI.
Karmaklubb* er ein organisasjon som dei siste åtte åra har arbeidd med å skapa skeive møteplassar og hendingar, frå vinsmaking og klubbing til samlingar på nettet.
Semb seier dei etter kvart har lært at dei må tilby andre ting enn festar og klubbing, og har i år utvida programmet med andre ting, mellom anna litt meir intime arrangement.
– Eg har vore lenge nok i denne bransjen til å merka at ting er i endring. I kjernegruppa er det ikkje nødvendigvis eit ønskje om å klubba heile natta, men meir om å møta folk.
– Trygge og gode stader der det er rom for samtale.
Større tilbod
Semb seier utelivet har endra seg mykje sidan korona, og at folk no gjerne går heim tidlegare enn før. I tillegg er det ogso folk som ganske enkelt ikkje er so glade i klubbing, so i år har dei fått eit større tilbod under det to dagar lange arrangementet.
– Det er fornuftig å tilpassa seg, men det er ogso hyggeleg og kjekt.
– I år har me mellom anna drag- og trykkverkstad, fermenteringskurs og eit arrangement om skeiv spiritualitet med pastor Eir Andrea Berg.
Fermentering
– Er det noko du sjølv ser litt ekstra fram til?
– Oi, det er eigentleg alt, men eg tykkje det er veldig kjekt å møtast i forkant av alt på Las Palmas Inn, laurdag kveld. Det er ei roleg samling med DJ og zine-verkstad, ein fin stad å berre prata litt.
– So er det kanskje dette med fermentering, som me ikkje har gjort før, men har forsøkt å få til ei stund.
– Fermentering? Er ikkje det litt smalt?
– Det er jo ikkje det! Folk vert stadig meir interesserte i skog, sopp, dyrking og småbruk og slikt. Dessutan smakar det godt, og det utruleg hyggelege folk som held kurset.
Kurset i fermentering går føre seg søndag ettermiddag.
Programmet elles strekk seg frå 19:00 til 00:00 på laurdag, då det meste av klubbing og festing går føre seg, og 12:00 til 20:30 på søndag. Søndag vert dei ulike kursa og arrangementa alkoholfrie.
Heile programmet kan ein finna her: https://karmaklubb.com/trans-pride_2025_2
