Kutt til dei svakaste i Oslo-budsjett: – Utsette for dobbelt stigma

– Konkret betyr dette at Pro sentret sine sosiale tenester vert nesten utraderte, seier Astrid Renland, spesialkonsulent ved sentret, fortvila. 

I den nye budsjettavtalen for Oslo det komande året er det føreslått eit kutt i velferdsetaten på 11 millionar kroner. Heile 3,5 av desse millionane vil etaten ta frå Pro sentret.

Sentret er eit velferdstilbod til sexarbeidarar i Oslo, i tillegg til å vera eit nasjonalt kompetansesenter for sexarbeid. 

Kutta betyr at heile ein av tre stillingar ved sentret vil forsvinna, og det vil særskild råka dei sosiale tenestene.