Pride
Årets Bygdepride er i gang
Laurdag føremiddag heisa ordførar Sølvi Dimmen i Volda regnbogeflagget i rådhusflaggstonga. Med det er årets bygdepridegfeiring i gang.
Utover den komande veka vert det ei rekkje arrangement, skriv arrangørane i ei pressemelding.
– Vi hadde aldri fått til ein slik festival utan gode samarbeidspartnarar, som Høgskulen i Volda, Studenthuset Rokken og Ørsta kyrkje, seier leiar Rune Sæbønes i Bygdepride i meldinga.
Han nemner at det vert arrangement både på høgskulen og på Rokken.
Torsdag 7. mai vert det regnbogemesse i Ørsta kyrkja, og i år vil fokuset vere på kyrkja sin veg til å godta likekjønna ekteskap og orsakinga til skeive som kyrkja kom med i fjor.
Laurdag 9. mai er den store paradagen i Volda.
Paraden går som vanleg frå Steinrøysa, og med slutt i Uppheimsparken, der det ventar paradeshow med underhaldning og appellar.
– Vi ynskjer alle velkomne til å delta på arrangementa våre. Bygdepride er den viktigaste hendinga for skeive i heile Bygde-Noreg, og er stadig like naudsynt, seier Sæbønes.
Han oppmodar folk om å følgje Bygdepride si eiga nettside og Bygdepride sine kanalar på sosiale medium.
